चितवन । चितवनको भरतपुरमा ७२ घन्टामा ७० श्ययाको अस्पताल निर्माण सम्पन्न भएको छ ।
अस्पतालका प्राविधिक संयोजक डा. भोजराज अधिकारीले चितवन उद्योग संघको प्रदर्शनी केन्द्रमा ७२ घन्टामा ७० श्ययाको अस्पताल नर्माण गरिएकाे बताए ।
अधिकारीले अस्पतालमा आइसियू, एचडियू र जनरल वार्डसहित ७० श्ययाको अस्पताल बनाइएको बताए । उनले भने, 'आइसियू र एचडियू बेड तयार गर्न केही दिन लाग्ने भए पनि अन्य बेड बिहीबार नै तयार पारिएको छ ।'
कोरोनाको संक्रमण फैलिएपछि चीनले ६ दिनमा एकहजार बेडको अस्पताल बनाएर विश्वलाई चकित बनाएको थियो । भरतपुरमा पनि त्यसकै झल्को दिनेगरी ७२ घन्टामा ७० बेडको अस्पताल निर्माण गरिएकाे छ ।
भरतपुर महानगरपालिकाका मेयर रेनु दाहालले बिहीबार आयोजित पत्रकार सम्मेलनमा ५० बेड तयार भइसकेको जनकारी दिइन् ।
‘बाँकी आइसियूलगायत बेड २, ३ दिनभित्र तयार हुन्छ,’ मेयरले भनिन्, ‘ अस्पतालमा आठवटा भ्यान्टिलेटरका लागि प्रदेश सरकार र संघीय सरकारसँग कुराकानी भइरहेको छ ।’
