आइतबार बसेको सर्वपक्षीय बैठकले २० दिनको अन्तरालमा सीमा नाका खोल्ने व्यवस्था मिलाउन केन्द्र सरकारलाई अनुरोध गर्ने निर्णयसमेत गरेको छ । एक साताको अवधीमा मात्रै ६ हजार आठ सय ८२ जना जिल्ला भित्रिएकाले क्वारेन्टिन व्यवस्थापन गर्न समस्या भएको भन्दै उक्त निर्णय गरिएको हो ।
क्वारेन्टिन वनाउनका लागि भौतिक संरचनाको अभाव रहेको, जनशक्ति अभावका कारण क्वारेन्टिन व्यवस्थानमा समस्या भइरहेको, सुरक्षाकर्मी र स्वास्थ्यकर्मीहरुको समेत अभाव रहेको अवस्थामा दिनहुँ सीमा नाका खोल्दा भारतबाट आउनेको संख्या बढ्ने र यसले क्वारेन्टिनमा बसेकाहरुमै कोरोना फैलिन सक्ने खतरा रहेको बैठकको निश्कर्ष छ ।
यदि २० दिनको अनतरालमा सीमा नाका खोल्ने व्यवस्था मिलाउने हो भने एक चरणमा आएकालाई १४ दिनपछि परीक्षण गरी सेल्फ क्वारेन्टाइनमा राख्ने र अर्को चरणमा आएकालाई व्यवस्थापन गर्न सजिलो हुने बैठकले निर्णय गरेको छ ।
यस्तै सम्वन्धित व्यक्ति र परिवारलाई प्रतिवद्धता गराई स्थानीय स्वास्थ्यकर्मी र स्वयंसेवकको निगरानीमा रहने गरी होम क्वारेन्टिनमा राख्न सकिने व्यवस्था गर्नसमेत केन्द्र सरकारलाई आग्रह गरिएको छ ।
यस्तै क्वारेन्टिन व्यवस्थापनका लागि स्थानीय तहहरुले स्वयंसेवक समूह गठन गर्ने, क्वारेन्टिन बनाउन संरचना अभाव देखिएकाले सरकारी तथा गैरसरकारी संस्थाका भवनहरु र निजी विद्यालयका भवनहरु समेत प्रयोग गर्ने निर्णय भएको छ ।
क्वारेन्टिन अभावको कारण मुलुकभित्रका अति सम्वेदनशील स्थानहरु बाहेकका जिल्लाहरुबाट आएका व्यक्तिहरुलाई होम क्वारेन्टिन वा सेल्फ क्वारेन्टिनमा राख्ने व्यवस्था मिलाउने समेत बैटकको निर्णय छ ।
