काठमाडौं । बाक्लो हुस्सु र तुवाँलोका कारण सोमबार बिहानदेखि उडान प्रभावित भएको तराईका तीन वटा विमानस्थल मंगलबार पनि अझै सञ्चालनमा आउन सकेका छैनन् ।
त्रिभुवन विमानस्थल कार्यालयका कार्यबाहक महाप्रवन्धक देवचन्द्रलाल कर्णका अनुसार विराटनगर, जनकपुर र भैरहवा विमानस्थलमा न्यून भिजिविलिटीका कारण उडान अवतरण ठप्प छ । अन्य विमानस्थलमा भने उडान-अवतरण भइरहेको छ ।
काठमाडौं विमानस्थलमा भने सोमबार र मंगलबार साविकमा जस्तै उडान अवतरण भएको उनले जानकारी दिए । काठमाडौंमा सामान्यतया १ हजार मिटरसम्म भिजिबिलिटी भए उडान-अवतरण हुन्छ ।
मंगलबार ४ हजार मिटरसम्मको भिजिविलिटी रहेका कारण त्रिभुवन विमानस्थलबाट हुने उडान-अवतरण भने कुनै समस्या नपरेको कर्णले जानकारी दिए । अन्तर्राष्ट्रिय उडान समेत भइरहेको उनले बताए ।
त्रिभुवन विमानस्थल कार्यालयका अनुसार मंगलबार हङकङबाट नेपाल एयरलाइन्स, दोहाबाट कतार एयरवेज, दुबईबाट नेपाल एयरलाइन्स, दिल्लीबाट एयर इण्डिया, दमामबाट हिमालय एयरलाइन्स र दोहाबाट आएको नेपाल एयरलाइन्सका जहाज अवतरण गरिसकेका छन् ।
