प्राज्ञिक विद्यार्थी परिषद् नेपालले १५ वटा जिल्लाका २५२५ जना विद्यार्थीलाई शैक्षिक सामग्री वितरण गर्ने भएको छ ।
शुक्रवार राजधानीमा पत्रकार सम्मेलन गरेर परिषद्ले देशका १५ जिल्लाहरूका १६ वटा विद्यालयमा अध्ययनरत २५२५ जना विद्यार्थीलाई शैक्षिक सामाग्री वितरण गर्ने जानकारी दिएको हो ।
प्राज्ञिकले हिमाल, पहाड र तराईका जिल्लाहरू तेह्रथुम, संखुवासभा, सिराहा, काभ्रे, सिन्धुली, रौतहट, बारा, मकवानपुर, रुपन्देही, बागलुङ, गुल्मी, रोल्पा, कालिकोट, जुम्ला र डडेलधुरामा शैक्षिक सामाग्री वितरण गर्ने गइरहेको राष्ट्रिय महासचिव विष्णुप्रसाद पंगेनीले जानकारी दिए ।
शैक्षिक सामग्रीहरूमा ब्याग, कपी, कलम, रेपिडेक्स पुस्तक जेमेट्रिक बक्स, नेपाली वृहत् शब्दकोश, टोपी लगायत रहेको छ ।
प्राज्ञिकका राष्ट्रिय महासचिव विष्णुप्रसाद पंगेनीले विगतमा पनि विपन्न आर्थिक अवस्थाका विद्यार्थीका लागि शैक्षिक सामाग्री वितरण गरेको जानकारी दिए । उनले असल र कुशल व्यक्ति निर्माणमा प्राज्ञिकले निरन्तर क्याम्पस विश्वविद्यालय र विद्यालयहरूमा आफ्नो रचनात्मक गतिविधि सञ्चालन गरिरहेको बताए ।
कार्यक्रममा प्राज्ञिकका राष्ट्रिय मिडिया कार्य प्रमुख कृष्णप्रसाद हुमागाईँले विद्यार्थी परिषद्ले सेवा सँगसँगै क्याम्पस विश्वविद्यालयलाई दलीय भागबन्डाबाट मुक्त राख्ने, माटो सुहाउँदो स्वदेशी विचार, संस्कार र संस्कृति झल्किने शिक्षा नीति निर्माणमा पनि उदाहरणीय कार्य गरिरहेको बताएका थिए । साथै उच्च शिक्षासम्म अङ्ग्रेजी र नेपाली दुवै माध्यममा विद्यार्थीले पढ्न पाउनु पर्ने र नेपाली भाषाको संरक्षण गर्ने अभियानमा पनि परिषद्ले आवाज उठाइरहेको जानकारी दिँदै यस विषयमा सबैले साथ दिनुपर्ने बताएका थिए ।
विद्यार्थी परिषद्ले गत वर्ष पनि ११ वटा हिमाली जिल्लाका १८ सय भन्दा बढी विद्यार्थीहरूलाई शैक्षिक सामग्री वितरण गरेको थियो ।
परिषद्ले नेपालबाहेक भारत सरकार, भारतीय जनताको सहयोगमा उक्त शैक्षिक सामग्रीहरू वितरण गर्न गइरहेको पत्रकार सम्मेलनमा जानकारी दिइएको थियो ।
