काठमाडौं । जापानको भएको टोकियो ओलम्पिक खेलमा आज भएको जुडोको प्रतिस्पर्धामा नेपालकी सोनिया भट्टको पहिलो खेलमै हार भएको छ । उनी रुसकी प्रतिस्पर्धी खेलाडीसँग खेलको दुई मिनेट ४४ सेकेण्डमै पराजित भएकी हुन् ।
आजकै सुटिङको प्रतिस्पर्धामा कल्पना परियारले पनि पराजय व्यहोरेकी छन् । उक्त खेलको स्वर्णपदक चीनले हात पारेको छ । कल्पनाले प्रतिस्पर्धामा राष्ट्रिय कीर्तिमान भने कायम गर्न सफल भएकी छन् ।
महिला १० मिटर एयर राइफल इभेन्टको छनोट चरणमा ६ सय १६–८ स्कोर बनाउँदै उनले राष्ट्रिय कीर्तिमान कायम गरेकी हुन् । १३ औं दक्षिण एसियाली खेलकुदमा पनि कल्पनाले नै ६ सय १४.५ स्कोरसाथ कीर्तिमान राखेकी थिइन् ।
टोकियोमा शुक्राबार ग्रीष्मकालीन ओलम्पिक खेलकुद प्रतियोगिताको औपचारिकरुपमा सुरु भएको थियो । उद्घाटन समारोहमा नेपालका तर्फबाट गौरिका सिंहले मार्च पासको नेतृत्व गरेकी थिइन् ।
