राष्ट्रिय सभाबाट व्यक्तिको टेलिफोन ट्र्यापिङको अधिकार गुप्तचर निकायलाई दिने गरी नेपाल विशेष सेवा गठन र सञ्चालनसम्बन्धी कानुन संशोधन र एकीकरण गर्न बनेको विधेयक पारित भएको छ ।
राष्ट्रिय सभाले सो विधेयक बुधबार बहुमतले पारित गरेको हो ।
राष्ट्रिय सभाले पारित गरेको सो विधेयक अब प्रतिनिधि सभामा जानेछ ।
र, प्रतिनिधि सभाले पनि सो विधेयक तलमाथि नगरी पास गरे राष्ट्रिय अनुसन्धान विभागभित्र छुट्टै प्रतिगुप्तचरी संयन्त्र निर्माण हुनेछ । र सो प्रतिगुप्तचरी संयन्त्रले व्यक्तिको समेत फोन ट्र्यापिङको अधिकार प्राप्त गर्नेछ ।
प्रचलित कानुनअनुसार कल ट्र्यापिङका लागि अदालतको अनुमति अनिवार्य भए पनि राष्ट्रिय सभाबाट पारित सो विधेयकअनुसार गुप्तचर निकायले अदालतको अनुमति लिनुपर्दैन ।
बुधबार राष्ट्रिय सभाबाट पारित भएको सो विधेयकसम्बन्धमा कानुन, न्याय तथा संसदीय मामिलामन्त्री शिवमाया तुम्बाहाङ्फेले मुलुक र जनताको सुरक्षाका लागि आवश्यक व्यवस्थालाई समेटेर विधेयक ल्याइएको जानकारी दिइन् ।
‘मुलुकको सुरक्षा, सार्वभौमसत्ता, भौगोलिक अखण्डता र नेपाली जनताको सुरक्षा, विशिष्ठ, अति विशिष्ठ व्यक्तिहरुको सुरक्षामा केन्द्रित छ,’ उनले भनिन्, ‘यही उद्देश्य र प्रयोजनका निम्ति यो विधेयक अगाडि बढाएका छौँ ।’
